Sonetti romagnoli/Sempre il conclave

[ 254 ]

SEMPRE IL CONCLAVE

Sembra che durante il Conclave sarà soppressa la distribuzione dell’ acqua negli appartamenti destinati ai Cardinali che ne sono forniti.

(La Tribuna, 28 luglio 1903).

I.

I pò toi l’ acqua, mo n’ avè paura
Che i Cardinel par quest in passa un guai;
Sl’ è par laves, i prit ins leva mai
E sl’ è par be, la bumba l’ è sicura.

Pen d’ caccar, d’ lozz e d’ crocch par su natura,
Che dal volt i’ ha la pell ch’ l’ ha fatt al scai,
T’ pu immaziné che pozza da furmai
E ch’ razza d’ erca ch’ ui sarà in clausura.

E difatti aven vest che ch’ la matena
Ch’ is asrè da par lò in t’ la surgarola
I pinsè prema d’ tott a la cusena:

I tus la pgnata, e’ sped, la cazzarola
E’ curtell, la cuciera e la furzena
Mo gnanc’ on ch’ e’ tuless la bagnarola.

[ 255 ]

II.

I misteri d’ la Santa Religion
E bsogna rispetei coma misteri,
Prema par via ch’ un i capes nisson
E pu parchè agl’ i è coss da to in t’ e’ seri.

Donca l’ è dogma d’ fed che l’ elezion
I la fazza in ch’ e’ fiè da vituperi
E che l’ incens ch’ i drova in t’ al funzion
Ui epa da scappè da e’ mesenteri.

E l’ è par quest che i puvar Cardinel,
Par l’ unor d’ la cucherda bianca e zala,
I’ ha e’ stabi sota coma i’ animel.

L’ è un us antig e guaiamai ch’ us perda
Parchè se Crest l’ è ned in t’ una stala
E su Vicheri i l’ ha da fe in t’ la m....