Sonetti romagnoli/Dulor

[ 241 ]

DULOR

E’ Vicheri di Dio, cun bon rispett.
Ui ciapé, dmenga nott, un cagarazz
D’ manira ch’ ui dasè la mola a lett
E l’ inlurdé i linzul e e’ matarazz.

I cardinel i dess ch’ l’ era mel d’ pett
Ch’ l’ era forsi un tincon, mo ló, e’ purazz,
La cagarula l’ hai faseva efett
E us n’ andeva, squizzend, a ca d’ e’ c....

Alora i pritt is ataché al campan
I cantè dal nuven coma i fringuell
E tot al cis al s’ impiné d’ putt....

Al ciateni al pianzeva a rotta d’ coll
E un paroch, ch’ l’ era andè in t’ i Calzinell,
L’ ha vest al legrom ch’ al faseva al pscoll.