Sonetti romagnoli/La brenda

[ 153 ]

LA BRENDA

I.

Me, Temistocle, Opimio, Clodoveo,
Egisto, Aristodemo, Geremia,
Epaminonda, Palamede, Feo,
Telemaco, Tancredi e e’ zop Elia,

Orlando, Pirro, Pericle, Pompeo,
Teodorico, Amilcare, Tobia,
Nullo, Menotti, Aristide, Aristeo,
Cariulano, Scipion, Febo, Isaia,

I vens cun al su donn: l’ Ifigenia,
L’ Isolina, l’ Elettra, la Dircea,
La Zenobia, la Merope, l’ Argia,

L’ Andromaca, la Saffo, la Medea,
La Mirra, la Penelope, la Pia,
E l’ Irma cun su medar Galatea

[ 154 ]

II.

E andessom a Santerna in tanti avtur
Ch’ us aveva invidé Pino Pulett
— Bravo! E’ fiol d’ Cecco — par magnè i caplett
Ch’ e’ guideva Archimede, imbariegh dur.

Al credat? A paremia un branch d’ sgadur
E Tugnazz un magnè zent trentasett,
Una mezza tachena, du gallett
E un pastezz d’ macaron cun e’ brod scur.

E i brindisi? «Un eviva a quel bodino!»
— «Io bevo a la salute nostra d’ nò!» —
«Burdelli! abbasso l’ acqua e viva il vino!»

E dop a la grustè, dop ai maron,
La sgnora Imelde, ch’ l’ è la mama d’ Pino,
L’ as mandé una barila d’ zabajon.

[ 155 ]

III.

E’ sarà stè parchè a magnessom trop,
E’ sarà stè i caplett e e’ zabaion,
Mo e’ fatto stà che tott e’ gioran dop
Avessom una bela indigestion!

Mè a dseva gumitend: «Oh Dio ch’ a sciopp!»
E iqué so l’ urineri e zo i bragon
E via ch’ andeva par di dri d’ galop
Cun una sciolta ch’ la pareva e’ fion!

I Pulett, caro te, i’ è bona zent
E Pino, nenca lò, l’ è un bon burdell,
Mo i tira a fev la pell, un azident!

Fatto stà ch’ a cagh.... al budell
Mo st’ etra dmenga ai turnaren tott quent
Par fe una gran magneda d’ parpadell.