z vice n); il dicas nido e ni (quale EP.!) nesto (on povas certe hezitar, nam la du radiki esas egale internaciona, sed ni ne volis chanjar ula vorto sen suficanta motivo); same vulno vice EP. vundo[1]. Il dicas legiono, skorpiono, quale ni, quankam la Fundamento ipsa donas legio, skorpio! Il uzas halucinacio, irigacio, e ni la verbi : halucinar, irigar; avanco, e ni la verbo avancar; tributo, e ni la verbo tributar; la verbo eskorti, e ni la nomo eskorto (nam on ne povas dicar, ke eskorto eskortas; ol akompanas); absolutismo, despotismo, patriotismo, qui che ni derivas per la sufixo -ism; bankiero, quan ni vicigas por reguloza derivajo bank-isto (same barbiro EP. e ES. barbisto); formala, formalaĵo, qui esas por ni reguloza derivaji; miksturo vice nia derivajo mix-uro; karakterizi, qua esas por ni derivajo, karakter-izar; aristokratio, vice la reguloza aristokrat-aro; pioĉo, dum ke ni derivas pioch-ilo de la verbo piochar; celibato fine, qua esas derivajo, dum ke ni derivas celib-eso de la necesa radiko celiba, qua vicas la ridinda fraŭlo.
So Bein uzas balsamado, enbalzamigi, e ni : balzam-izar, balzamizo; quo esas plu reguloza? Il uzas ignoranto en senco di ne savanto; ni uzas ignorar en senco specala : vole ne savar. Il uzas sakrilegi (verbo), same quale ni sakrilejar, vice la substantivo EP. sakrilegio. Il uzas fakelo vice torcho; fono vice fundo en senco artala, sed qua derivas per naturala metaforo de la senco generala (on dicas la fundo di la ceneyo, la fundo di pikturo, quale la fundo di salono). Il uzas quale radiki avangardo, ariergardo, dum ke ni formacas reguloze avan-guardo, dope-guardo. Il uzas vadi en senco irar, e ni vadar, sed en specala senco (marchar tra rivero). Il uzas la verbo revizi, quale ni, sed anke revizio (Dro Zamenhof uzas ya revizoro vice la reguloza reviz-isto!). Il uzas la verbo rezigni en senco demisar, e la nomo rezignacio en la senco di nia verbo rezignar (F. se résigner).
Restas nur kelka vorti, quin ni ne havas, e qui ne semblas omni, sive utila, sive bone selektita. Demoralizi povus tradukesar senmoral-igar. Spektatoro; spektanto suficas. La ceteri esas alianco, auroro, fotelo (F. fauteuil!), firmamento, glaŭka, libertinismo, mago (F. mage), paciento (kurac-ato, operac-ato), prestiĝo, prestidigitatoro, relikvo, ŝoseo (F. chaussée), tifono (F. typhon).
On rimarkas ke ca lasta vorti esas omni franca, e kelki mem pure, krude franca; se ni enduktus li en la vortaro, lor on povus akuzar ni, kun kelka versimileso, francigar la LI. Sed, sincere parolante, ta vorti semblas a la Franci tro franca, e pro co poke barbara, e li ne audacus enduktar li. Ne-franca Esperantisti montras ofte tendenco uzar franca vorti; ni ne mallaudas li, sed ito semblas pruvar, ke la franca vorti, sive havas granda internacioneso, sive juas granda favoro che la ne-franci.
Per ta komparado on vidas ke Dro Bein uzis multa nuva vorti,
- ↑ Se ni adoptus nido, vulno, on akuzus ni latinigar la linguo!
