keta, nonka lekate sereń hõ alga idiyena ar hoṛ hõ apnar roṛte sek̕reń kante ạḍi raskạ monteko sereńet̕ tahẽkana. Nonka lekate kam kaj calao reaṅ subita idik̕ ehop̕ena. Ar Papa do ańjom ańjomte ar ka;mi iditege roṛ doe cet̕ idiket̕a.
102. Ar ale do Pạdṛi sahebko rakap̕en dosar serma Bengạḍiạ ato khon Ṭhạkurpurạ atotele ucạṛena. Ucạṛren reak̕ karon do; pe dhaoteń biṛkieyan, Pạhil do ḍạn ạimại ńindạko riạukidińa ako tuluc̕ daṛan lạgit̕. Ado bạń seonat̕takoteko dhirạukidińa. Acha bam ańjomlet̕talea, ńelam. Ado mit̕ din sim rak̕ gại kaḍań aṛak̕ akat̕kore baṛge latarre maraṅ okoc̕ kule eset̕kidińa; ado mit̕ṭaṅ dosra gupiyic̕ un hõ kaḍae aṛak akat̕ko tahẽkana; ado bogete kạuạ rạuạń hohoadea, adoliń tiń ńirkedea. Ado mit̕ dhao do peṛa hoṛok̕ iń dukạna; ado ruaṛre Kạuạmuhul dhasna horre maraṅ okoc̕ kule eset̕kidińa; adoń ńelkede khan taenom sengeń ńir ruạṛrena. Ado bar hoṛ soṅgeń ńapamen; adokin kulikidńa; Cedak̕em dạṛet̕a? Ado kuliń uduk̕at̕kinạ. Ado unkin hõ ńelkate ạḍi bạṛic̕kin botorena. Ado eṭak̕ sentele parom calaoena. Ado noako reaṅ dadańtikiniń lạiat̕kin khan ojha ṭhenko ńel ocoket̕a; ojha doko menket̕a, Nui koṛa do ḍạn ạimạiko bạṛic̕ akadea. Ona botorte Ṭhạkurpurạ atotele dạṛket̕a.
103. Ado ale do ḍher dhao Papa ar Hargeṭ saheb tikinak̕ porcar ańjomte ar jao lekage hapṛamkoak̕ porcar ańjom ańjomte onḍen eae oṛak̕ren hoṛ reak̕ mon ạcurentalea. Ado Papa do hapṛamkoe