idi toraket̕kote onḍen hoṛe umket̕koa, ar onḍen um boehako rạskạ ocoko lạgit̕ Papa do khube bhojat̕koa. Ar Sirạm do onḍeye tahẽyana koe ar girjawako lạgit̕. Ar gidrạko hõ olok̕ paṛhaoe cet̕akoa, ar mit̕ bela inạ sor atokoreye daṛana.
100. Ar Papa ar Kerap do din dinte hoṛ pạrsikin cet̕ idiket̕a Hoṛ pạrsikin cet̕ idiket̕ khan ado Baṅgla bhasa dokin bạgi idiket̕a. Ado Hoṛ roṛtegekin koe arkin girjạia, ankin porcaret̕ tahẽkana. Menkhan ona oktere Roman akhorte Hoṛroṛte puthi baṅ tear akan tahẽkante ạḍi din dhạbic̕ Baṅgla Bạibel khon torjomạkate Hoṛ roṛtekin porcaret̕ tahẽkana ar sereń Hoṛ roṛte baṅ tahẽkante Baṅgla sereńge ạḍi din dhạbic̕ko sereńet̕ tahẽkana, arhõ Midnipur mison khon baṅgla akhorte Hoṛ parsiteko torjoma akat̕ sereń puthiko maṅgaoket̕a.
101. Ado onḍenak̕ sereń puthi maṅgaokate sereń reaṅ hõ alga hoyena; ente ona do Hoṛ roṛteko torjoma akat̕ tahẽkana; ona iạte hoṛ hõ algateko sereń daṛeat̕a. Ar Kerap saheb do Hoṛ pạrsi ced lạgit̕ mit̕ṭaṅ hoṛ gurui dohoana, Baromạsiạren Khudu ńutumanic̕ Uni do olok̕ paṛhao hoṛe tahẽkana; ar uni do iṛtic̕ guṛtic̕ oṛe oṛpat̕ Hoṛ pạrsi baḍaearen ạḍitet̕ husiạr ar gạkhuṛ utạr hoṛe tahẽkana ar ạḍi sojeh hoṛ. Ona iạte Kerap saheb do moner moton hoṛe ńawante ạḍitet̕e rạskạyena, ar algate hoṛ roṛe cet̕ idiket̕a. Ar hoṛ roṛe cet̕ ńõk̕ket khan Kerap saheb do baṅgla akhorte Hoṛ roṛte Hoṛ sereńe torjoma