6. La grupo esperas, ke ta societi e grupi, qui, seducita per malvera e nepreciza raporti di kelka konservema chefi, sive ekiris ek la Delegitaro, sive protestis kontre sa decidi, konocos balde sa eroro, e kompensos ol per kontra, plu justa e plu yusta rezolvi e decidi.
« Genève, la 2 Julio 1908.
A Siori Leau e Couturat, sekretaryi di la Delegitaro e c.
Siori,
Me havas honoro informar vu ke en sa administrala kunsido di la 2 Julio 1908, la Société de Physique decidis adoptar la sequanta konkluzi di la raporto di sa delegito So René de Saussure :
1. Prenar noto, ke la helpanta linguo elektita principe da la Delegitaro esas la linguo di Dro Zamenhof konocata sub la nomo Esperanto.
2. Ne enirar en diskuto pri la questiono di reformi propozenda a la Esperantisti, pro ke ta questiono ne esis previdita en la programo di la Delegitaro, e pro ke la Société de Physique de Genève ne konsideras su kompetenta por expresar opiniono pri ta temo.
3. Konsiderar la rolo di sa delegito quale fininta e konseque permisar ad il retraktar de la Delegitaro.
Voluntez aceptar, Siori, e c.
A ta letro esis adjuntita la demiso di So de Saussure quale membro di la Delegitaro. Ni respondis per la sequanta letro :
« A Sioro Sekretaryo di la Société de Physique de Genève.
8 julio 1908.
Sioro,
Ni havas honoro certigar vu pri ricevo di vua letro de 2 Julio, ed informar vu, ke ni agos konforme. Ni devas nur facar omna nia rezervi pri la konkluzo 1a, quan ol enuncas. Se la Société de Physique voluntas « prenar noto » di la decido di la Komitato di la Delegitaro, ol devas prenar noto exakte e komplete : « La Komitato decidis adoptar principe Esperanto… sub rezervo di ula modifiki exekutenda da la konstanta Komisitaro en la direkto definita per la konkluzi di la raporto di la sekretaryi e per la proyekto di Ido ».
