qua preiris e preparis li. Nula yuristo, nula honesta homo povas kontestar ta verajo. La franca Republiko (on memorigas to ofte) esis votita per plumulto de un voto. Supozez, ke la morga dio un ek la votanti repentis e retraktis : la Republiko tamen existus, ed existus yure. Same la Linguo internaciona existas, ed ol triomfos per sa propra forteso ed evidenta supereso, per la interna qualesi, quin ol debas a la konciencoza labori di la Komitato e di la konstanta Komisitaro. Homi asociita dum kelka jorni a komuna laboro pose disiras, korpe e forsan anke spirite, e lia personala tendenci povas oblivyigar da li la tempala konsento, quan produktis inter li la forteso di la verajo e la lumo di la ciencala diskuto. Sed la homi fatale pasas, plu o min rapide : nur la verko restas, irge qua esas la diveno e destino di la kunlaborinti.
Por refutar omna shikani, per qui on penas kombatar od alterar la decidi di nia Komitato, suficas citar ta du chefa fakti, quin ni memorigas a nia amiki :
1e : La decidi di nia Komitato esis votita unavoce, pos longa diskutado e kun plena interkonsento pri lia texto (redaktita intence por obtenar ta unavoceso), da Si Ostwald, Baudouin de Courtenay, Jespersen, Dimnet (vicanta So Harvey), Hugon (vicanta So Stead), Moch (vicanta So Boirac), Rodet (vicanta So Bouchard), Couturat e Leau.
2e : La negocii inter nia Komitato e la Lingva Komitato esis rompita propramove, la 18a januaro, da Dro Zamenhof e da So Boirac samtempe, pro ke nia Komitato, per l’ organo di sa prezidanto So Ostwald (sola responsiva pri ta negocii), rifuzis agnoskar (por su ipsa) l’ autoritato di la Lingva Komitato e di l’ Esperantista Kongresi (!); altravorte, pro ke la Lingva Komitato rifuzis agnoskar la nedependo di nia Komitato, e postulis, ke ol submisez sen kondiciono a sua autoritato. To esas pruvita da la dokumenti, quin ni publikigis en No 1 (aparte da la letri di nia prezidanto So Ostwald) e da la cirkulera letro di Dro Zamenhof « al ĉiuj Esperantistoj ».
Winterthur, 16 junio 1908.
A la Delegitaro por adopto di linguo helpanta internaciona, Paris.
Quale Prezidanto di la Esperantista grupo en Winterthur (Suiso) me havas la honoroza komiso komunikar a vu la sequanta rezolvo facita en la kunveno di 12 Junio 1908 en « Restaurant National » :
« Konsiderante la importanta simpligi di Esperanto, nun nomizita
