tato. Mem kelka esperantisti dissemas privata, sekreta cirkuleri pri ula demisi, qui ne existas, kredeble por evitar publika dementii od obligata rektifiki. Pro ke ni deklaris e promisis, de la komenco, exkluzar severege omna personala questioni, ni tute abstenas rektifikar tala aserti, per qui on penas deturnar l’ atenco di la publiko de la vera e sola questiono : la linguala questiono. Cetere, esus ya grandega e malfacila tasko, serchar e restaurar la verajo pri omna rakontachi, qui plenigas ula jurnali! Ni nule pretendas facar inquesto e quaze censuro pri la dici ed agi di la membri di la Komitato, dum lia tuta vivo. Li esis tute libera, en nia Komitato, expresar lia opinioni, diskutar la opinioni di altri, e votar segun sa cienco e sa koncienco. Li esas same libera expresar nun, en lia personala nomo, omna opinioni, quan li volas, o quan on volas : e se on raportas maljuste lia opiniono, to esas lia afero, ne la nia. Por ni nur un opiniono di li valoras : ta, quan li expresis, pos dekok kunsidi de labori e diskuti, per la decidi unavoce votita da la Komitato, e nule ta, quan li povas expresar sis monati pose sub irga extera influi. Se lia nuna opiniono rekte kontredicas la decidi, quin li ipsa votis, e mem la personala opinioni, quin li ante expresis publike, to esas questiono tute privata kun lia koncienco. Sed to povas nule malvalidigar ta decidi.
Nam oportas, taokazione, memorigar principi yurala tre simpla e konocata. Kande korporaciono elektita facis decidi, la valoro di ta decidi tute ne dependas de la posa eventi, de la chanji, repenti o demisi di la votinti. Lego votita da un Parlamento ne cesas valorar, se ta Parlamento esas dissolvita, o se posa elekti chanjas en ol l’ opinioni di la plumulto. On savas ke voto di un Chambro (en Francio) restas « aquirita » e valida, mem kande la posa rektifiki di la voli chanjas la plumulto en minmulto, ed inverse. Ta paradoxa regulo pruvas tante plu bone, ke to esas principo di yuro; ed efektive sen ol existus nula ferma e definitiva decido pri irga temo. Konseque, omna eventi posa a la decidi di nia Komitato, omna dici ed agi personala di sa membri, omna demisi di delegiti, povos nulo chanjar a ta decidi nek diminutar lia valoro. Mem se (per ecesa ed extrema hipotezo) la Delegitaro tute dissolvesus nun, mem se omna membri di la Komitato retraktus nun lia opiniono e rinegus lia formala voto, la decidi di la Komitato konservus la sama valoro, quan li debas, cetere, a la kompetenteso di sa membri, ed anke a la libera e zorgema diskutado,
