42. Menkhan bạbuk̕ic̕ do bae ańjomlet̕talea, pas hõe capat̕ giḍikat̕a, kaḍa hõ khoaṛteko idiket̕koa; chak̕ḍao reaṅ poesa hõ bạnuk̕tale, ạḍitet̕le khae khabṛok̕ena, Cet̕bon cekaea, cekatebo chaḍaokoa? Adoń menket̕talea, Jãhãge jãhã dapaṛok̕, Dhubṛi Maraṅ sahebren porja kangeabo tho? Unige thoe ạguyet̕bona; uni ṭhengebon calak̕a ar abonak̕ dukbon lạiaea, ado unige jãhãnak̕geye budabon. Ado noa menkate bar hoṛ do Maraṅ saheb ṭhen Dhubṛiteliń calaoena, arko doliń metat̕koa, Ma ape do idi jarwakope.
43. Ado Dhubṛi senkate Maraṅ saheb joto duk harkhet reaṅliń lạiadea. Ado Maraṅ saheb doe kulikt̕lińa, Okoe bạbu kanae, ńel orom akadeaben? Adoliń lạiadea. Ńel orom akadealiń, soṛok bạbu kanae. Ado Maraṅ saheb do ạliń soṅgete bar sipạhiye kolket̕kinạ are metat̕lińa, Nui bạbu kanae. Adokin hatkedea, arhõ pher Dhubṛitele calaoena, arel hạjirkedea, Maraṅ saheb ṭhen; ado ạyup̕ente Maraṅ saheb sipạhiye metat̕kinạ, Ma uni do nońjorbondre doho aṅgayeben, gapa setak̕ iń ṭhen hạjirok̕pe.
44. Ado dosar hilok̕ ạuri kacahari lagaok̕rege Maraṅ saheb do ac̕ak̕ baṅglaregeye bicạrket̕a. Maraṅ saheb bạbui kulikedea, Amge nokoren kaḍam khoṛ akat̕koa? Adoe menket̕a, Hẽ ińge. Ado Maraṅ saheb bạbui metadea, Cedak̕em khoaṛket̕kotakoa? Ado bạbui roṛ ruạṛket̕a, Hẽ, soṛok cetante