sikhạu paṛạhao, bud bhorsa galmaraoako lạgit̕, ar jãoṛe jãoṛekin sikhạu paṛhaoket̕koa, Koejoṅ ar girjạ alotet̕gepe ḍhilạua, Isor alope hiṛińea, uniak̕ daya hirlạre koejoṅte baṛe tahenpe, unige noa bir disomreye goṛo are horho jaṅgepea, ar hapen taenomre Isor dayate boge hoyok̕tapea. Nonka leka mit̕ hapta din ạḍi kurumuṭutekin sikhạu paṛhaoket̕koa:
40. Arhõ Papa ar Mama do calak̕ dela dili rekin lại oṭoat̕koa, Aperen kaḍa ḍaṅgrako seṭerlen khange thoṛa din taenomre Kerap sahebe hijuk̕a, ar uni hec̕kate jotoaṛ reak̕k bondobos oṭoapea. Ado niạko bud batlao oṭo baṛakate Papa ar Mama dokin ruạṛ calaoena. Ar ale mare disom khon gại kaḍa ạk̕guko do Assam Koloni tiog lạgit̕te turui hapta lagaoat̕lea, ar Kerap saheb gai kaḍa ạguko lạgit̕ mit̕ṭaṅ pase emat̕le tahẽkana, jemon horre aloko ạṛuk̕ dhạṛuk̕le lạgit̕, sạrige bako ạṛukk̕ dhạṛuk̕let̕lea, boroṅko goṛoat̕lea.
41. Ado menkhan mucạt̕re Golokgońjreko ạṛuk̕ dhạṛuk̕ket̕lea; karon do soṛok cetante pea kaḍako dec̕ paromlena; ado khoaṛteko idiket̕koa; unre pasle uduk̕at̕koa, ar ạḍi kạ̃uạ̃rikate soṛokren bạbule laiadea, ale do, bạbu, mare disom khonle hijuk̕ kana. Dhubṛi maraṅ sahebren porja kanale, Gumạ Kolonire boskotok̕ lạgit̕le calak̕ kana Maraṅ sahebak̕ hukumte ma dayakate kaḍa aṛak̕kakotaleme; ente ale tire cet̕ ṭaka poesa hõ bạnuk̕talea; ale jom reaṅ muskil hoe akantalea; ma bạbu dayawaleme.