Maka Maha Radja pergilah sendiri dan membawa raijat raijatnja aken mentjari Kaij Tjoe Tjhoeij di Goenoeng jang terseboet di atas, djoega tiada boleh ketemoe padanja, kerna lebat hoetannja.
Maka moefakatlah Maha Radja aken bakar oetan itoe, soepaija gampang boleh ketemoe pada Kaij Tjoe Tjhoeij , jang tamtoe ija nanti kloear dari dalem hoetan jang lebat itoe, aken tetapi sia-sialah adanja perboeatan itoe, kerna tatkala hoetan itoe di bakarnja, hingga 3 hari 3 malem lamanja baroelah padam api itoe, tiadalah kalihatan Kaij Tjoe Tjhoeij kaloewar dari dalam hoetan, hanja matilah ija angoes kerna api itoe dengan iboenja berplok sama sama djadi arang di bawah poehoen Lioe .
Maka menjesallah Maha Radja kerna perboeatannja itoe, dan hantjoerlah hatinja kerna kasian pada mantrinja jang telah mati terbakar itoe, maka di prentanja raijat raijat aken koeboerken maitnja di sitoe djoega, betoel pada hari jang kelima boelan Sagweek. (Sa Gweek tjhe gho). Maka 2 hari di moeka sebelonnja hari Tjeng Beng di seboetken »Han Siet Djit" artinja makan barang dingin, dan di larang tiada boleh orang bawa api di koeboer boeat masak-masakan tanda pringatan kasian dari kematiannja Kaij Tjoe Tjhoeij .
Maka lantaran Mantri Kaij Tjoe Tjhoeij tela binasa itoe maka sekalian orang-orang bangsa Tjina saban tahon bikin pesta Tjeng Beng, aken bikin betoel koeboeran dari orang-orang toea'nja dan sanak- sanak soedaranja dan di brinja makan aken orang-orang mati (atau di sombaijangin) dari sebab itoe, maka sampe zaman ini toeroen menoeroen bangsa Tjina saban tahon meradjaken pesta Tjeng beng adanja.
