recenta agi di ta korporaciono, o plu exakte, di la individui qui, pos inicatir sa formaco, atribuis a su fakte sa direkto sub la nomi di sekretaryo generala e di kasisto, agi, qui facas granda bruiso nun; ed ol ricevas de li rigretinda impreso.
Samtempe ol saveskas ke ta agi jus efektigis la retrakto di adheri samspeca, olim donita a la Delegitaro da la Société française de Physique, da l’ Association française pour l’ Avancement des Sciences, da la Société française de Photographie, da la Société internationale des Electriciens,…..[1], ke simila deserti pro la sama kauzo preparesas nun da la Touring Club de France, da….[1], ke la sama agi esas anke rinegita per sucedanta demisi di membri di la Komitato di la Delegitaro, quan la supredicita individui elektigis en la lasta tempo sur listi de kandidati kompozita per lia propra manui.
Ol memoras, ke sa adhero esis anuncita en omna publikigaji statistikal di la Delegitaro; ol informesas ke la direktanti di olca jus fondis, quale oficiala organo, revuo monatala sub titolo « Progreso ».
Pro omno to, per l’ unavoceso di la prezenta membri, l’ Académie liberigas su, ye dato di la unesma agi supre citita, de tuta solidareso kun la Delegitaro, cesigas aparte la komiso di delegito, quan ol donis a So Méray. Sed por evitar omna malvera interpreto di sa decido, ol deklaras samtempe konservar, kun tre forta acentizo, motivizita da la posa eventi, omna sa malnuva simpatii por la linguo artificala Esperanto, tala quala ol kreesis da So Dro Zamenhof, vidar en ol la solvo kompleta e definitiva, tante longe e vane serchita, di la problemo gravega di linguo helpanta internaciona. Ol komisas So Méray, sa antea delegito, publikigar ca rezolvo kande il judikos to utila, notifikar ol sen ajorno a la riprezentanti di la Delegitaro, demandante, ke li mencionez ol en numero proxima di lia jurnalo Progreso, ed efacez la nomo di la kompanio sur omna listo de adheri.
Por konforma extraktajo,
Vidita: la prezidanto,
Chabot.
A ta letro So Leau respondis per la sequanta (originalo franca) :
Paris, la 19 Junio 1908.
Sioro,
Me hastas certigar vu pri ricevo di vua hierala letro e di l’ extraktajo di protokolo di la kunsido di 27 Mayo di l’ Académie des Sciences, Arts et Belles-Lettres de Dijon. Me pregas, ke vu voluntez komunikar mea respondo a l’ Académie.
L’ Académie « igas informar su » pri la « agi » di la Delegitaro, o plu exakte pri ti di la « sekretaryo generala » e di la « kasisto ».
