KHONG TJOE SABAGI GOEROE-DOENIA.
Orang jang dateng minta peladjaran pada Khong Tjoe, menoeroet tjatetan dalem hikajat, djoemblahnja ada riboean, terdiri dari orang toea dan moeda, hartawan dan melarat, kaoem militair dan civiel, jang semoea dateng bergeroemoetan akan denger adjarannja, hingga namanja Khong Tjoe sabagi goeroe dan poedjonggo djadi tersiar di seloeroeh Tiongkok.
Kira liwat tiga taon komoedian, doea poetra dari saorang bangsawan agoeng di Lu dateng pada Khong Tjoe aken mendjadi moerid, dan kemoedian dengen dianter oleh itoe doea moerid dan dibri ongkos oleh Markies dari Lu, Khong Tjoe brangkat ka iboekota dari ini negri, di mana ia preksa isi jang berharga besar dari bibliotheek karadja'an dan fahamken djoega muziek kraton Lu jang pada itoe djeman ada terkenal paling sampoerna di seloeroeh Tiongkok Menoeroet katerangannja achli hikajat Sze-ma Chien, di itoe waktoe Khong Tjoe telah bertemoe pada Lao Tze, pendiri dari Too Kauw (Taoisme), jang ia koendjoengin bebrapa kalih. Khong Tjoe di itoe waktoe baroe beroesia tigapoeloeh lebih sedeng Lao Tze atawa Lo Tjoe soedah toea sekalih. Dalem itoe pertemoean katanja Lao Tze pandang rendah pada Khong Tjoe dan oetjapken omongan mendjengèkin pada itoe goeroe-moeda poenja angen angen aken perbaeki kasopanan manoesia, tapi Khong Tjoe tinggal teroes menghormat dan menaro harga tinggi pada pikirannja itoe goeroe-toea.
Tida antara lama dalem negri Lu telah timboel kakaloetan besar lantaran beberapa minister brontak melawan pada radja, jang telah kena dikalahken dalem pertempoeran, hingga terpaksa moesti lari ka negri Tsi (Tjee Kok) jang djadi tetangganja. Dan Khong Tjoe, jang tida bisa hadepken perboeatan ponggawa jang mengoesir radjanja tjoemah boeat merampas kakwasa'an, soedah toeroet djoega mengalih ka negri
25
