pagla lekayena ado gujuk̕ pon mõṛẽ̱ din lahare dãṛạ̃ baṛaete Grahampur kompateye hec̕lena, ar ḍakṭor khan sor mit̕ṭaṅ dare buṭạreye tahẽyena. Ado aḍitet̕e laṅga idiyena; ado unre aleren ḍakṭor Raya Soren mon ạcur ńutumte ạḍiye galmarao bujhạuadea. Menkhan tirit̕ lekae menketa, Bạṅ, baṅ alotet̕gem lạiańa; iń do Bạhni boṅga baṅgeye aṛagiń kana, ińak̕ bańcao ar do bạnuk̕a; nitok̕ domon bań acur daṛeak̕ kana. Soetane gherao eset̕ akadińa, bańcaok̕ reak̕ as bhorsa do chuṭạu akantińa. Gujuk̕ dhạbic̕ ạḍi keṭec̕geye roṛket̕a. Ar gujuk̕ bar din lahare do gujuk̕ botorte ạḍitet̕e udạsena, bar ńindạ do bogeteye kuhrạ̃ua, ar botorgeye gaḍra goḍro are aḍraoket̕a ar bogeteye rak̕ket̕a, O haere, O haere cet̕ hoyentińa, ar kạuạ̃rikate gaḍra goḍro bogeteye hohoket̕a; E babu, E bạbu phalna dela hijuk̕me. cele coṅ botorgeko hec̕akana, bogete kuṭạmedińa; haere haere, okateko idiyedińa. Ar hae haekateye menkdeda. Alope idińa, alope idińa; okatepe idiń kana? O haere, O haere, bạbu, maseko idiń kan do, E se alope ḍhaklaoińa, alope kuṭạmińa! O haere, norok seṅgeltel o idiń kan do! Adoe metadea, Nitok̕ dole cekamea; Lahare mon bam ạcurlak̕a; cekatele dok̕ daṛeama? Nonka leka kuhrạ̃u kuhrạ̃ute as chuṭaukateye goc̕ena.
92. Ado nonka leka uniak̕ gaḍra goḍro ar aḍrao ar chaṭpat; as chuṭaukate gujuk̕ ńelte, ńelket̕ hoṛ ar uniak̕ onako botor ṛoṛ ańjomte ạḍitet̕ botorko