On ragg a briscola in quatter

On ragg a briscola in quatter.

Minga de segn in prima man! — Sta attent!
   ten su i tó cart e lassa fa de mì....
   El giœugh l'è fior... — Te strozzet? Bravo! Inscì!
   Seguita inscì che ghe l'emm bell e dent!
Guardom donca!... Sont là... Ti te gh'et nient?
   Alegher! Lisc! — No! — Speccia!... Ciappa chì!
   Te gh'et nanca el lattee? Ma, cara tì,
   te despias de coppatt per on moment?
Hoo pescaa minga mal!... Se pò giustass!...
   Hoo vist! Piéntela! Hoo vist! Fall pù el muson!
   Adess nissun le sà che te gh'et l'ass!
Giuga el carich... Ah, Dio!! Semm fœura nun?
   Cunta i pont e pœu parla, o s'ceppinon!...
   Cinquantanœuv!... E quist fan sessantun!