On desideri

On desideri.

Fœura del badalucch della citaa,
   giò del pont de San Cels, vers el daziett,
   a man drizza gh'è on praa; e, de là del praa,
   gh'è ona casetta cont on giardinett.

Chì son nassuu in d'on bell dì d'estaa,
   col grì che me cantava intorna al lett:
   chì, in mezz ai fior, hoo tiraa sù 'l primm fiaa,
   e hoo faa 'l primm vers anch mi cercand i tett.

Quanto temp ch'è passaa dopo quell dì!
   Quanti palazz hoo vist, quanti giardin!
   Ma el cœur ogni moment el torna chì!

Oh, almanch podess, dove sont staa bambin,
   dopo tanti travaj vegnì a morì!
   E dormì coi mee vecc al Gentilin!