Hin sti do classa de ciarlatan poetta

Hin sti do class de ciarlatan poetta
   i Petrarclista e i Arcad; e sappiee
   che l'ha reson la Frusta del Baretta,
   chi hin bona part copista per mestee;
   parabolan, che drœuven la rezzetta
   de serviss di rezzett del temp indree.
   Trovand insei costor la suppa fada,
   no dan via che menestra rescoldada,

Sti Petrarchista hin tucc a ona manera !
   Tucc vœren lamentass de gamba sana!
   La soa dea, siel pœù vera o no siel vera,
   già l'ha d'ess ona tigra in forma umana.
   Chi ha la motria, chi i dœuj, chi se despera,
   chi è gelos, chi è tradit, chi ha la mattana.
   Hin pienn sti rimm d'amor, de guaj, de rogn,
   e hin sti poetta tanc martin taccogn.

Ora domandi mi: qual sarà mai
   el caratter fettiv ciarlatanesch,
   se no l'è quell de sti seccastrivaj,
   pastrugnador e scimbi petrarchesch?
   Para, voltia, messeda, e tocca, e daj,
   coi solet fras no fan che di grottesch!
   L'è propri tutta fava a chi le menna,
   e l'è semper l'istessa cantilenna.

I ciarlatan d'Arcadia hin insci anch lor!
   Hin tucc o pegoree o bovirœù ;
   coi ziffol e i ghitarr se fan onor;
   e, a credegh, canten come rossignœu.
   No parlen che de lacc, castegn, erb, fior,
   de grott, gabann, bosch, praa, vign, camp e brœu,
   e de vacch, e de pegor, e de caver:
   freggiur de no ess guarii gnanch de san Maver.

Gh'han de bon ch'ogni ninfa o pastorella,
   (ch'el vœur di ogni villana o bionda o bruna!)
   l'ha per neccessitaa d'ess semper bella...
   chè, in Arcadia, de brutt ne nass nissuna;
   là, poet, mudand el nomm, la parentella,
   de quij campagn tucc s'en spartissen vuna;
   ma, quant a frutt n'en ponn regœuj nient,
   via del prim estem che dà via i patent.

Quest donch l'è stil, quest l'è'l pensà ordenari
   de sti pastor de nomm, ch' hin nient manch
   a mé parer de quij tal strafusuri
   che fan de strappadenc, de saltimbanch.
   Quij marter van col solet formolari
   fissaa a memoria a recitall su franch;
   e i Arcad, ei custod e sottcustod
   squas tucc rebatten semper l'istess ciod.