Alcuni canti popolari romagnoli/VI. Rispetti

[ 13 ]

VI.

RISPETTI

A la longa d’ sta vì di érbor uns’ n’ è
  L’ è Iusafèn ch’ ui ha taié da pè.
  Ui ha lassê sol una ramadèna,
  Stasi pu all’ ôra bella giuvinèna.
  Ui ha lassê sol una ramadella,
  Stasì pu all’ ôra giuvinèna bella.

Dmatèna a voi andê a la fira d’ Fénza
  Avdér a fê l’ amor coma ch’ us cménza.
  A fê l’ amor us cménza par Nadêl,
  E quand e’ ven la Pasqua us lassa andêr.
  A fê l’ amor us cmenza vers a Pasqua,
  Us fa pr’ un mes o du, e dop us lassa.

[ 14 ]

La strêda d’ Roma l’ è cuverta d’ seda,
  I ram i è d’ ôr, al foi agli è d’ muneda.
  La strêda d’ Roma l’ è cuverta d’ lèn,
  I ram i è d’ ôr e al foi agli è quattrèn.

Drì da sta strê ch’ la s’ ciama la Vì Cuva
  Ui sta di brév ch’ is vô pu fê paura.
  Dla paura nuiétar an n’ avèn
  E s’ i ha de piomb a se barattarèn:
  I ha da savé che dla paura an n’ ho
  E s’ i ha de piomb a i e’ barattarò.

E tott agl’ erb a gli ha la su ciamêda;
  Vo ch’ a sì bella, vo a sarì dmandêda.
  E tott agl’ erb a gli ha la su virtó;
  Vo ch’ a sì bella a sarì tôlta só.

Quelli da Travarsêra al sì lamenta
  Che i su murùs in cisa is indurmenta.
  A Travarsêra ui è di bei burdéll,
  Mo quìi d’ Bagnacavall i è nènc piò béll.
  A Travarsêra ui è dal bel burdelli,
  Quelli d’ Bagnacavall agl’ è pió belli.

[ 15 ]

Se me a m’ marid a m’ voi pu tô Nadêl;
  Sa n’ ho de pan an andarò a zarchê.
  A n’ andarò a truvê da quìi d’ in là;
  A la dona d’ Nadêl tott ì in dà.
  A n’ andàrò a zarchên in dimpartott;
  A la dona d’ Nadêl ì in dà tott.

O Mariina da la cà bassetta,
  Dasìm a me che fior ch’ avì a l’ ureccia!
  Che fior ch’ avì a l’ ureccia e pê che rida,
  Dasìm a me cl’ anell ch’ avì int’ al dida!
  L’ anell ch’ avì int’ al dida l’ è tott d’ ôr,
  La zémma ch’ ui è indentar l’ è e’ mi côr!

A sera piculèna, a sera tosa,
  E tott i m’ dumandêva par murosa:
  Adess mo ch’ am so fatta un po’ piò granda
  An trôv un azziment che mi dumanda.

A sent una ragnêda là a la longa,
  Um pê la mi sumàra ch’ am arsponda.
  A sent una ragnêda là a travers,
  Um pê la mì sumàra ch’ a i ho pers.