Aiva da mont

N'aiva serena arjentina
la toma, la bagna le crode,
le goze le sbriza, le bagna dut cuant.
Le crepe che bef de sta aiva sarena
i é negre i é slisce i é bele limade
e l'aiva la toma con forza dal aut.
Dut chiet l é intorvia
e ilò l é n crabal
che centa, che scraia
che fas se fermà
duc cuanc chi che sent
ntel chiet de chi crep
l jeme l slament
de chel'aiva sarena arjentina
che toma, che sbriza che bagna
le crode limade da dute le goze
che sauta contente via e ca;
i se ferma e i se bagna
ma i resta contenc a vardà.
Senza se intende che intant
le ore passa, le cor
come chel' aiva sarena arjentina
che toma, che bagna, che lima
e che sliscia i sas e le crode.
E l'aiva arjentina che toma
se ferma, se slargia japé
e chieta e sarena
n lach l'à injigné.
Chel lach no se ferma
ma toma saren arjentin
e sbriza inavant sue goze via e ca.
N bel sol le inlumina
e color de ogni sort
ven fora da l'aiva
che toma arjentina
che sbriza che sauta
che mai no se ferma
che semper se n va.
Japé de le crepe chel'aiva sarena
la giava ju sot nte tara
la cor a se sconde nte pra
dut bel vert,
e dessot ntel pien
la torna a centà.
N'aiva sarena arjentina
ven fora e contenta ai picui guziei
ai fiori a le arbe a bestiam e a la jent
da beve, sarena la i dà.

A.L.