Versione dello Stabat Mater

Versione dello Stabat Mater.

La Madonna, in att pietos,
   la guardava el sò car tos
      ch'el pendeva de la cros.
La soa anima l'è stada
   anca quella tormentada
   e ferida d'ona spada.
L'eva in cas de mancà via
   per la gran malinconia
   la gran Mader del Messia.
De ver cœur la sospirava
   tucc i vœult che la guardava
   el fiœu che tormentava.
Chi sarav, in st'occasion,
   che vedend, tanta afilizion,
   no piangess per compassion?
In quell stat vun ch'avess vist
   la Madonna e Gesù Crist,
   senza piang pòdel resist?
I peccaa de tanta gent,
   e di mee prinzipalment,
   del Signor hin sta el torment.
L'han veduu destes su on legn
   quell sò car unegh sostegn
   che l'amava a l'ultem segn.
Oh, gran Mader, tutta amor,
   sti mee œucc fei piang auch lor
   per dolor del vost dolor.
Sto me cœur inflammell vu,
   perchè possa amà Gesù,
   e che sia tutt de lu.
Ah, vorev che se scolpiss
   in mi i piagh del Crocefiss,
   e in mi stassen semper fiss.
Del vost tos, ch'el s'è degnaa
   de soffrì per mi tant maa,
   di sò penn femmen mitaa.
Con vu fee che piangia anmì
   el Signor ch'han faa morì,
   senza mai desmett on dì.
Sul Calvari vorrev ess!
   Chè el sarav el temp adess
   de sta là a piangev appress.
Oh, gran Vergin, no guardee
   che sia staa vun di giudee...
   Giust per quest femm piang pussee.
Fee che anmì, per me confort,
   possa avè la bella sort
   d'ess a part de quella mort!
Fee che sia anmì ferii,
   e el me cœur tutt imbibii
   de quell sangu che gh'è sortii.
Cara Vergin, femm servizi!
   No lassèmm andà in perdizi
   in quell dì del gran giudizi.
Oh, Signor, quand vegnarà
   quell gran pont de mudà cà,
   per mezz sò femm trionfà.
Quand sto corp l'andarà in fin,
   fee che in ciel, coi Serafin,
   possa stagh anch Meneghin!